آر ایس ایس فیڈ
آیت اللہ جنتی نے جمعے کے خطبے میں کہا کہ برطانوی سفارت خانے کے عملے کے بعض ارکان نے لوگوں کو ہنگامے پر اُکسانے کا اعتراف کرلیا ہے
یورپی یونین سے وابستہ ملکوں نے تہران میں برطانوی سفارت خانے کے عملے کی گرفتاری پر باضابطہ احتجاج کر نے کے لیے ایرانی سفیروں کو طلب کرنے کا فیصلہ کیا ہے۔
عہدے داروں نے کہا ہے کہ یورپی یونین کے رکن ملکوں نے جمعے کے روز برسلز میں ایک اجلاس کے دوران اس اقدام سے اتفاق کیا ہے۔
یورپی یونین کے عہدے دار ایرانی عہدے داروں کے لیے ویزے کے اجرا پر پابندی سمیت دوسرے اقدامات پر بھی غور کررہے ہیں۔
ایران کے ایک چوٹی کے ملاّ آیت اللہ احمد جنّتی نے جمعے کے روز کہا ہے کہ انتخابات کے بعد مبیّنہ طور پر احتجاجی مظاہروں میں حصّہ لینے کی بنا پر برطانوی سفارت خانے کے عملے کے کچھ ارکان پر مقدمہ چلایا جائے گا۔ آیت اللہ احمد جنّتی نے جمعے کے خطبے میں کہا ہے کہ عملے کے بعض ارکان نے لوگوں کو ہنگامے پر اُکسانے کا اعتراف کرلیا ہے۔ جنّتی ایران کے رہبرِ اعلیٰ کے قریبی ساتھی ہیں۔
گذشتہ اتوار کے روز تہران میں برطانوی سفارت خانے کے عملے کے نو ارکان کو حراست میں لے لیا گیا تھا۔کچھ کو رہا کردیا گیا ہے، لیکن برطانوی حکومت کا کہنا ہے کہ دو ابھی تک پولیس کی تحویل میں ہیں۔
برطانوی دفترِ خارجہ نے جمعے کے روز تشویش کا اظہار کیا ہے اور کہا ہے کہ وہ ان اطلاعات کی چھان بین کررہا ہے کہ ان ملازمین کو مقدمے کے سامنا ہے۔
