آر ایس ایس فیڈ
صدر باراک اوباما نے کہا ہے کہ ان کا ملک چین کے ساتھ ایسے تعلقات چاہتا ہے جو صرف اقتصادی امور تک محدود نہ ہوں بلکہ یہ عالمی اہمیت کے حامل تمام معاملات کا احاطہ کرتے ہوں۔ یہ بات انہوں نے دورہ چین کے دوران بیجنگ میں چینی وزیر اعظم ون جیا باؤ کے ساتھ ملاقات سے پہلے کہی۔
دورہ مکمل کرنے سے پہلے امریکی صدر کی چین میں یہ آخری اہم مصروفیت ہے۔ باراک اوباما نے اپنے چینی ہم منصب ہُو جن تاؤ کے ساتھ ہونے والی اس بات چیت کا ذکر کرتے ہوئے کہا کہ دونوں ملکوں نے اپنے سٹریٹیجک تعلقات کو وسعت دیتے ہوئے ایسے شعبوں میں تعاون بڑھانے پر اتفاق کیا ہے جو امریکہ اور چین کے لیے نہایت اہمیت رکھتے ہیں۔ چین کے وزیر اعظم نے اس توقع کا اظہار کیا کہ صدر اوباما کے دورے سے دونوں ملکوں کے درمیان تعلقات کو نئی جہت حاصل ہو گی۔
صدر منتخب ہونے کے بعد باراک اوباما کا چین کا یہ پہلا دورہ ہے۔ قیام کے دوران انہوں نے دیوار چین کا بھی دورہ کیا۔ایشیا کے اس دورے کے آخری مرحلے میں باراک اوباما جنوبی کوریا جائیں گے جہاں شمالی کوریا کے جوہری تنازعے سمیت دیگر معاملات پر بات چیت ہو گی۔
