آر ایس ایس فیڈ
جمعرات کو فرانس کے شہر لِلی میں جاری عالمی کپ کوالی فائنگ ٹورنامنٹ کے اہم لیگ میچ میں پاکستان نے جاپان کو با آسانی ایک کے مقابلے میں چھ گول سے ہرا کر فائنل میں جگہ بنالی۔
توقع کے برعکس جاپان کی ہاکی ٹیم پاکستان کے خلاف کوئی مزاحمت پیش نہ کر سکی اور پاکستان ٹیم تمام وقت کھیل پر چھائی رہی۔ پاکستان کی طرف سے سہیل عباس اور ریحان بٹ نے دو دو جب کہ شکیل عباسی اور محمد عمران نے ایک ایک گول اسکور کیا۔
پاکستان ہاکی ٹیم لیگ کا آخری میچ جمعے کو پولینڈ کےخلاف کھیلے گی۔
پاکستان کے پینلٹی کارنر کے ماہر سہیل عباس نے جمعرات کو دو گول کرکے اپنے گولوں کی تعداد 292کرلی ہے اور اگر وہ 300گول کرنے میں کامیاب ہوتے ہیں تو انٹرنیشنل ہاکی کی تاریخ میں وہ 300گول اسکور کرنے کا ہدف حاصل کرنے والے دنیا کے پہلے کھلاڑی بن جائیں گے۔
جمعرات کو کھیلے گئے ایک اور میچ میں پولینڈ نے اٹلی کی ٹیم کو چار ایک سے ہرا دیا۔
