آر ایس ایس فیڈ
جمعہ کی صُبح دارالحکومت اسلام آباد کے آئی ایٹ سیکٹر میں پاکستانی فوج کی ایک گاڑی پر دو نامعلوم مسلح افراد نے خودکارہتھیاروں سے حملہ کر کے ایک فوجی افسر اور ان کے محافظ کو زخمی کردیا۔
حملہ آور موٹر سائیکل پر سوار تھے اور واردات کے بعد فرار ہوگئے۔ اطلاعات کے مطابق زخمی افسر کا عہدہ بریگیڈئیر کا ہے جنہیں فوری طور پر پمز ہسپتال منتقل کردیا گیا جہاں ڈاکٹروں نے بتایا ہے کہ دونوں زخمیوں کی حالت خطرے سے باہر ہے۔
پچھلے دوہفتوں کے دوران پاکستانی فوج کے یہ تیسر ے بریگیڈئیر ہیں جن پر اسلام آباد میں اس انداز میں حملہ کیا گیا ہے۔
اس سے قبل سوڈان میں اقوام متحدہ کی امن فوج کے ڈپٹی کمانڈر بریگیڈئیر معین احمد کی جیپ پر 22 اکتوبر کی صُبح دارالحکومت کے جی الیون سیکٹر میں دو موٹر سائیکل سواروں نے خودکار ہتھیاروں سے فائرنگ کر کےانھیں ڈرائیور سمیت ہلاک کردیا تھا جب کہ حملے میں ان کے محافظ زخمی ہو گئے تھے۔ بریگیڈئیر معین چھٹی لے کر کچھ روز کے لیے ذاتی کام کے سلسلے میں پاکستان واپس آئے ہوئے تھے۔
اس واقعہ کے چند روز بعد 27 اکتوبر کو بھی ایک فوجی جیپ پر اسی انداز میں فائرنگ کی گئی لیکن گاڑی میں سوار افراد اس حملے میں محفوظ رہے۔
ان واقعات کے محرکات واضح نہیں لیکن حکام کا ماننا ہے کہ یہ کارروائیاں جنوبی وزیرستان میں کالعدم تحریک طالبان کے خلاف فوجی آپریشن کا رد عمل ہو سکتا ہے۔
