آر ایس ایس فیڈ
بالی وڈ کِنگ شاہ رخ خان سے نیویارک ایر پورٹ پر امیگریشن افسر کی جانب سے کیے گئے برتاؤ سے سبق لیتے ہوئے سلمان خان نے اپنا امریکہ کا دورہ معطل کردیا ہے۔ سلمان اپنی نئی فلم وانٹیڈ کی تشہیر کے لیے نیویارک شہرجانے والے تھے۔
شاہ رخ کے روایتی حریف مانے جانے والے سلمان امریکہ میں اپنی پینٹِنگز کی نیلامی میں بھی حصہ لینے والے تھے جس سے جمع ہونے والی رقم کو وہ اپنے امدادی کاموں میں لگانے والے تھے۔ تاہم اِس پروگرام کے منتظمین کے مطابق سلمان نے عارضی طور پر اپنا دورہ معطل کر دیا ہے۔
واضح رہے کہ بالی وڈ فلمیں اور اُن کے ستارے امریکہ میں مقیم جنوبی ایشیائی باشندوں کے درمیان بےحد مقبول ہیں۔ امریکہ میں شاہ رخ اور سلمان کے لاکھوں مداح ہیں اور اِسی لیے سلمان کو اگلے ماہ ستمبر کی تین تاریخ کو اپنی نئی فلم وانٹیڈ کے تشہیری کاموں کے لیے نیویارک جانا تھا۔ تاہم خود سلمان نے پروگرام کے منتظمین سے کہا کہ وہ اِس وقت امریکہ کا سفر کرکے کسی بھی قسم کا خطرہ مول لینا نہیں چاہتے۔
غیر مصدقہ رپورٹ کے مطابق سلمان اِس لیے بھی امریکہ نہیں جارہے کیونکہ اُن کے ایک قریبی رشتےدار کو ممبئی میں واقعے امریکی قونصل خانے نے ویزا نہیں دیا ہے۔
سلمان کی نئی فلم وانٹیڈ کے پروڈیوسر بونی کپور، اداکارہ سری دیوی اور فلم کے ڈائریکٹر پربھو دیوا بھی نیویارک میں ہونے والے تشہیری پروگرام میں حصہ لینے والے تھے۔
