Banadir oo Guddoomiye Cusub Yeelatay

Eng. C/rizaq Maxamed Nur (Nuunne) ayaa maanta loo magacaabay inuu si KMG ah u hoggaamiyo maamul uu yeelanayo gobolka Banadir.

Waxa qoray Abdirahman Aynte & Hussein Barre | Washington Jimco, 06 November 2009

Guddoomiyaha cusub ee loo magacaabay gobolka Banadir, Eng. C/rizaq Maxamed Nur, oo ah waji ku cusub siyaasadda Somalia, ayaa sheegay inuu ujeedadiisa koobaad ay noqon doonto sidii uu wax uga qaban lahaa dhibaatada xagga ammaanka ee ka jirta magaalada Muqdisho.

Madaxweyne Sharif oo isagu magacaabay maamulka cusub, ayaa sheegay in ujeedadu aysan aheyn dhalliil loo jeedinayo maamulkii hore, balse ay tahay in, sida uu hadalka u dhigay, dhiig cusub lagu soo kordhiyo gobolka Banadir.
Maamulkii hore ee gobolka Banadir, ee uu hoggaaminayeen Cismaan Cali (Dhagaxtuur) iyo C/fitaax Shaaweeye, ayaa lagu ammaanay inay maamul ahaan ka wanaagsanaayeen kii ka horreeyey ee Max’ed Dheere, balse wax weyn kama aysan qaban dhibaatada ammaanka.
 

Guddoomiyaha baarbalaamka Soomaaliyeed, Sh. Adan Madoobe, oo isaguna maanta hadlay madasha lagu magacaabayay maamulkan cusub ee uu yaalanayo gobolka Banadir, ayaa sheegay inuu rajeynayo in maamulkan KMG ah ay muddo kooban kusoo diyaariyaan doorasho ka dhacda gobolka, maadaama sida uu yiri caasimaddu ay maqaam gaar ah leedahay.

Maamul beddelistan cusub ayaa kusoo beegmeysa iyadoo si weyn loo hadal hayo in madaxweyne Sh. Sharif iyo Ra’iisul Wasaare Cumar Sharma’arke ay goor dhow sameyn doonaan isku shaandheyn baahsan oo xagga golaha wasiirrada ah, iyo waliba inay magacaabi doonaan gudoomiyayaal gobol.
 

• E-mail 
• Daabaco 
• Faalladaada 

Faalladaada (0)

Gudbi

* * Lagama maarmaan (Required)