Mapurisa Anosunga Nhengo dzeZCTU

Washington   Muvhuro, 09 Mbudzi 2009

Mutungamiri weZCTU, VaLovemore Matombo, vatorwa ma finger prints neMuvhuro ku Victoria Falls, zvichitevera kusungwa kwavakaitwa neSvondo. 

VaMatombo vakasungwa vachipomerwa mhosva yekutyora mutemo wePOSA, vachinzi vakasangana nevamwe vavo vasina kupihwa bvumo nemapurisa. Vakasungwa pamwe naVaMatombo vanosanganisira national organising secretary weZCTU, Va Micheal Kandukutu, regional officer we Western Region, VaPercy Mcijo, pamwe nenhengo dze national  executive, VaDumisani Ncube naVaNawu Ndlovu.

Gweta revasungwa ava, Muzvare Nomagugu Mahlangu, vanoti vasungwa ava vari kutarisirwa kuendeswa kumatare edzimhosva emu Victoria Falls neMuvhuro.

VaWellington Chibebe ndivo munyori mukuru weZCTU. VaChibebe vanoti mapurisa ari kutyora mutemo nekusunga VaMatombo nevamwe vavo sezvo musangano wavaiita wakange usineyi nezvematongerwo enyika, asi kuti musangano wekuzeya mabasa eZCTU.

Dzimwe Nhau Kubva kuStudio7...

• Tererai 
• Tsambambozha 
• Pirinda