Карзаи даде заклетва на функцијата

  Четврток, 19 ноември 2009

Хамид Карзаи даде заклетва на почетокот на вториот петгодишен мандат на функцијата претседател на Авганистан, по оспорената победа на изборите засенети од измама.

Церемонијата на инаугурацијата се одржа четвртокот во претседателската палата во Кабул.  

Говорејќи пред странски државници и авганистански видни лица, Карзаи вети дека ќе се справи со корупцијата во владини редови за која кажа дека е „опасен непријател на државата“.

Карзаи е под интензивен притисок на Запад да се спротистави на корупцијата и да го подобри владиниот кредибилитет.  Тој вети дека ќе избере компетентни и стручни министри и дека ќе преземе мерки против оние кои ги пречекоруваат законите и уставот на земјата.

Авганистанскиот претседател најави дека друг приоритет на неговата влада ќе биде авганистанската армија да ја преземе водечката улога за безбедноста од меѓународните сили.  Карзаи изрази надеж дека за пет години, авганистанските сили ќе ги водат сите безбедносни операции.  Тој верува и дека ќе биде надминат „проблемот со меѓународниот тероризам во Авганистан“.

Американската државна секретарка Хилари Клинтон рече дека почетокот на новиот мандат на Карзаи отвора можност за авганистанските лидери да остварат „нов договор“ со својот народ.

• Испратете по електронска пошта 
• Испечатете